ملک ترقی اور اقتصادی خوشحالی کی راہ پرگامزن ہے،وزیر دفاع
اسلام آباد:(ملت آن لائن) وزیر دفاع خرم دستگیرخان نے کہا ہے کہ پاکستان مسلم لیگ(ن) کی دانشمندانہ پالیسیوں سے ملک ترقی اور اقتصادی خوشحالی کی راہ پرگامزن ہے۔ ہفتہ کو نجی ٹی وی چینل سے گفتگوکرتے ہوئے انہوں نے کہا کہ دہشت گردی کے واقعات میں کمی اور امن وامان کی صورتحال میں بہتری کے باعث ملک میں تجارتی سرگرمیاں بڑھی ہیں۔ وزیر دفاع نے کہا کہ تیزی سے ترقی کرتی ہوئی معیشت کے حوالے سے پاکستان کے مثبت تشخص میں نمایاں بہتری آئی ہے۔ خرم دستگیرخان نے کہا کہ چین پاکستان اقتصادی راہداری (سی پیک )منصوبہ پاکستان اور پورے خطے کیلئے گیم چینجر منصوبہ ہے اور اس منصوبے کو متنازعہ بنانے کی کسی کوبھی اجازت نہیں دی جائے گی۔ انہوں نے کہا کہ چین اور پاکستان کے تعلقات منفرد نوعیت کے ہیں اور ہمارے باہمی تعلقات کئی نسلوں پرمحیط ہیں، ہم چاہتے ہیں کہ دونوں ممالک کے قریبی دوستانہ تعلقات میں مزید اضافہ ہو اور استحکام آئے۔ انہوں نے مزید کہا کہ ہم اپنے دشمنوں کے عزائم سے خوفزدہ نہیں ہونگے اور عوام کی فلاح وبہبود کا سفر جاری رہے گا۔ملک ترقی اور اقتصادی خوشحالی کی راہ پرگامزن ہے،وزیر دفاع