خبرنامہ

نواز شریف ناانصافی کے نظام کا سامنا کر رہے ہیں: سعد رفیق

اسلام آباد: (ملت آن لائن) وفاقی وزیر ریلوے خواجہ سعد رفیق نے کہا ہے کہ نواز شریف ناانصافی کے نظام کا سامنا کر رہے ہیں، انہیں ملک سے لوڈشیڈنگ ختم کرنے کی سزا دی جا رہی ہے۔ جمعہ کو احتساب عدالت کے باہر میڈیا سے غیر رسمی گفتگو کرتے ہوئے خواجہ سعد رفیق نے کہا کہ میں اس نظام کو ہی ناانصافی کہتا ہوں، بیگم کلثوم نواز کی بیماری کا بھی خیال نہیں کیا گیا، نواز شریف کواہلیہ کی طبیعت ناساز ہونے کے باعث بار بار لندن جانا پڑتا ہے، یہ ان کے ساتھ سخت زیادتی ہے۔ انہوں نے کہا کہ نواز شریف کے لئے یہ نئی بات نہیں، انہیں پہلے بھی عدالتوں سے نااہل کیا گیا، قید کی سزائیں دی گئیں، جھوٹے مقدمات بنائے گئے، لیکن ان سب کے باوجود نواز شریف پاکستان کی جمہوریت سے عشق کرتے ہیں اور پاکستانیوں کا جمہوریت سے عشق ختم نہیں کیا جا سکتا۔

اسلام آباد میں میڈیا کے نمائندوں سے بات کرتے ہوئے اعتزازاحسن کا کہنا تھا کہ نوازشریف اور ان کی صاحبزادی مریم نواز اب دیوار توڑ کر نکلنے کی کوشش کررہے ہیں لیکن اب ریفرنس میں ان کے خلاف فیصلہ لازم ہے اور وہ مشکل میں ہیں لیکن جمہوریت کو کوئی خطرہ نہیں۔

اعتزازاحسن نے کہا کہ نوازشریف نے ہمیشہ فوج، عدلیہ اور اسٹیبلشمنٹ کے ساتھ مل کر پیپلزپارٹی اور جمہوریت کو نقصان پہنچایا، جنرل اسلم بیگ کے ساتھ مل کر بے نظیر کی حکومت کے خلاف نوازشریف ہی کھڑے ہوئے، ججوں پر دباؤ ڈال کر بے نظیر کو سزا بھی دلوائی، یوسف رضا گیلانی کو نااہل قرار دینے میں بھی ان ہی کا ہاتھ تھا اب پیپلزپارٹی کے ان کے ساتھ بیٹھنا مشکل ہوگیا ہے۔

بیرسٹراعتزازاحسن کا کہنا تھا کہ ایک عرصے سے کہہ رہا ہوں کہ نوازشریف شیڈو باکسنگ کررہے ہیں انہیں ہرکونےاور پردے کے پیچھے بھوت نظر آتے ہیں، ان کی اپنی حکومت ہونے کے باوجود کہتے ہیں کہ ان کے خلاف سازش ہورہی ہے اور وہ بتائیں کہ حکومت ان کی اپنی ہے تو جمہوریت کو کس طرح خطرہ ہوسکتا ہے اور نام لیں کہ آصف زرداری کس کے کہنے پر ان کے خلاف بات کررہے ہیں۔