خبرنامہ

اسلام آباد (ملت + آئی این پی) وزیراعظم محمد نوازشریف کی زیرصدار ت مشترکہ مفادات کونسل کے اجلاس میں 15مارچ سے مردم شماری شروع کرنے پر اتفاق کیا گیا،خانہ شماری اور مردم شماری ایک ساتھ کی جائے گی،مردم شماری دومرحلوں میں بھی کی جاسکتی ہے،مردم شماری کا ہر مرحلہ تمام صوبوں میں بیک وقت شروع ہوگا،مردم شماری کیلئے سیکرٹری شماریا ت اور چاروں چیف سیکرٹریز پر مشتمل کمیٹی قائم کی جائے گی جو حائل رکاوٹیں دورکرے گی۔جمعہ کو وزیراعظم محمد نوازشریف کی زیرصدارت یہاں مشترکہ مفادات کونسل کا اجلاس ہوا ۔مشترکہ مفادات کونسل کے اجلاس میں وزیراعلیٰ پنجاب میاں شہبازشریف،وزیراعلیٰ خیبرپختونخوا پرویز خٹک،وزیراعلیٰ سندھ مراد علی شاہ اور وزیراعلی بلوچستان نواب ثناء اللہ زہری نے شرکت کی۔اجلاس میں وفاقی کابینہ کے ارکان بھی موجود تھے،مشترکہ مفادات کونسل کے اجلاس میں ملک میں 15مارچ سے مردم شماری شروع کرنے پر اتفاق کیا گیا۔مردم شماری اور خانہ شماری ایک ساتھ کی جائیں گی۔اجلاس میں فیصلہ کیا گیا کہ مردم شماری دومرحلوں میں بھی کی جاسکتی ہے جس کا ہر مرحلہ تمام صوبوں میں بیک وقت شروع ہوگا۔اجلاس میں فیصلہ کیا گیا مردم شماری صوبائی حکومتوں کے مربوط رابطوں میں ہوگی،مردم شماری کیلئے سیکرٹری شماریات اور چاروں چیف سیکرٹریز پر مشتمل کمیٹی قائم کی جائے گی،کمیٹی مردم شماری کے حوالے سے عملدرآمد کیلئے تمام رکاوٹیں دور کرے گی۔