خبرنامہ

مالے(ملت + آئی این پی) چیئرمین سینیٹ میاں رضاربانی نے کہا ہے کہ پاکستان ایک امن پسند ملک ہے اور خطے میں استحکام ، لوگوں کی بہتری اور غربت میں کمی کا خواہش مند ہے مگر افسوس کہ ہمسائیہ ملک بھارت پاکستان میں ریاستی دہشت گردی میں ملوث ہے ۔ وہ پیر کو یہاں صدارتی محل میں مالدیپ کے صدر عبداللہ یامین عبدا لقیوم سے ملاقات کے دوران بات چیت کر رہے تھے ۔ملاقات میں سینیٹر سردار ذوالفقار خان کھوسہ ، سینیٹر نجم الحسن اور مالدیپ میں پاکستان کے سفیر بھی موجود تھے ۔ میاں رضاربانی نے مالدیپ کے صدر کو بتایا کہ حال ہی میں بھارتی نیوی کے حاضر سروس کمانڈر کل بھوشن یادیو کو پاکستان میں گرفتار کیا گیا ہے جو کہ پاکستان میں اپنے نیٹ ورک کے ذریعے دہشت گردی میں ملوث تھا ۔انہوں نے کہا کہ مذکورہ واقعہ کے ساتھ ساتھ بھارت کی جانب سے کیے جانے والے دیگر اقدامات اس کے خطے میں اس کے توسیع پسندانہ عزائم کو ظاہر کرتے ہیں ۔چیئرمین سینیٹ نے کہاکہ بھارت کے ان اشتعال انگیز اقدامات کے باوجود پاکستان خطے میں دیر پا امن کا خواہشمند ہے اور چاہتا ہے کہ مسئلہ کشمیر کو اقوام متحدہ کی قرار دادوں کی روشنی میں حل کیا جائے ۔انہوں نے بھارت کی جانب سے مقبوضہ کشمیر میں انسانی حقوق اور بین الاقوامی قوانین کی خلاف ورزی کے حوالے سے آگاہ کیا اور مالدیپ کے صدر کی مقبوضہ وادی میں بھارت کے مظالم اور معصوم بچوں کی بنیائی ضائع ہونے کے واقعات کی جانب توجہ مبذول کروائی ۔ انہوں نے مزید کہا کہ 90 روز گزرنے کے باوجود مقبوضہ وادی میں مسلسل کرفیو ہے اور معصوم افراد بچے اور خواتین زندگی کی بازی ہار رہے ہیں ۔جبکہ یہ تمام لوگ بھارت سے اقوام متحدہ کی قرار دادوں کی روشنی میں اپنے حق خود ارادیت کے علاوہ کچھ نہیں مانگ رہے ۔چیئرمین سینیٹ نے کہا کہ پاکستان مالدیپ کی جانب سے دولت مشترکہ کی رکنیت چھوڑنے سے متعلق آگاہ ہے اور ایک آزاد ملک کی جانب سے اس فیصلے کی عزت کرتا ہے ۔انہوں نے کہا کہ دولت مشترکہ ایک اہم تنظیم ہے اور مثبت روابط برقرار رہنے چاہیں ۔چیئرمین سینیٹ نے پاکستان اور مالدیپ کے مابین دوطرفہ تعلقا ت کو مزید فروغ دینے اور بھارتی رویے کے پیش نظر سارک کے کردار کے از سر نو تعین کی ضرورت پر زور دیا ۔