خبرنامہ

پاکستان سے بہترتعلقات سے ہی امریکا سکیورٹی خدشات سے نمٹ سکتا ہے، احسن اقبال

اسلام آباد:(ملت آن لائن) وفاقی وزیر داخلہ احسن اقبال کا کہنا ہے کہ پاکستان میں دہشتگردوں کی کوئی محفوظ پناہ گاہیں نہیں ہیں جب کہ پاکستان سے بہترتعلقات سے ہی امریکا سکیورٹی خدشات سے نمٹ سکتا ہے۔ امریکی اخبار واشنگٹن ٹائمزکو انٹرویو دیتے ہوئے وزیرداخلہ احسن اقبال کا کہنا تھا کہ ٹرمپ انتظامیہ کی کامیاب حکمت عملی کیلئے پاکستانی شراکت داری انتہائی اہم ہے کیوں کہ پاکستان سے بہترتعلقات سے ہی امریکا سکیورٹی خدشات سے نمٹ سکتا ہے۔ احسن اقبال نے کہا کہ پاکستان کی خواہش ہے کہ امریکا کے ساتھ تعلقات بہتر رہیں، دونوں ملک بیٹھ کر بات چیت سے بے اعتمادی کا خاتمہ کریں جب کہ امریکی الزامات سے دونوں ملکوں میں بے اعتمادی بڑھ رہی ہے کیوں کہ پاکستان میں دہشت گردوں کی کوئی محفوظ پناہ گاہیں نہیں ہیں۔ وفاقی وزیر داخلہ نے کہا کہ سی پیک سے پاکستان کا اقتصادی اثر ورسوخ بڑھ رہا ہے، امریکا اور پاکستان کے تعلقات میں خرابی سے خطے میں عدم استحکام ہوگا، افغانستان میں ممکنہ جنگ کیلئے امریکا کو پاکستان کی ضرورت ہوگی کیوں کہ پاکستان کے بغیرامریکہ کے افغانستان میں جنگ جیتنے کے امکانات کم ہیں۔