خبرنامہ

پاکستان کو غیر ریاستی عناصر کا بڑا چیلنج درپیش ہے: احسن اقبال
اسلام آباد:(ملت آن لائن) احسن اقبال کا کہنا ہے کہ پولیس افسران اور نوجوان اہلکاروں کی مہارت سے متاثر ہوا ہوں، پاکستان نے دہشت گردی کے خلاف 60 ہزار سے زائد جانوں کی قربانی دی۔ انہوں نے کہا دہشت گردی کے خاتمے تک جنگ جاری رہے گی۔ وفاقی وزیر داخلہ احسن اقبال نے پولیس اکیڈمی کی تقریب سے خطاب کرتے ہوئے کہا پاکستان کو غیر ریاستی عناصر کا بڑا چیلنج درپیش ہے، اگر ہم جمہوریت کے راستے پر چلتے رہتے تو پاکستان آج متحد اور ترقی یافتہ ملک ہوتا۔ ان کا کہنا تھا کہ دہشت گردی کے خلاف جنگ میں پاکستان کو ایک ارب ڈالر سے زائد کا نقصان ہوا، پاکستان کی تاریخ شہدا کے خون سے عبارت ہے۔ احسن اقبال نے کہا دہشت گردی کے خلاف پاکستان کو جانی و مالی نقصان اٹھانا پڑا، ہمیں اپنے ملک کو نفرت سے پاک اور قائداعظم کے فرامودات کے مطابق بنانا ہے۔ احسن اقبال نے اپنے خطاب میں مزید کہا پولیس عوام کی خدمت کے لئے اپنی بھرپور صلاحیتیں بروئے کار لائے اور فرائض کی ادائیگی میں ایمانداری کو اپنا شعار بنائے۔ انہوں نے کہا پولیس بہترین تربیت سے ہی معیاری خدمت انجام دے سکتی ہے، اگر پولیس مضبوط ہو گی تو طاقتور کمزور پر ہاتھ نہیں ڈال سکے گا۔ ان کا کہنا تھا کہ دنیا ٹیکنالوجی کی بدولت سمٹ چکی ہے، نجی شراکت داری سے ہر شعبے نے ترقی کی ہے۔