پاکستان کی معیشت صحیح سمت میں گامزن ہے: صدرممنون
اسلام آباد: (ملت آن لائن) صدر مملکت ممنون حسین نے کہا ہے کہ پاکستان تمام دوست اوربرادرممالک کے ساتھ دوطرفہ تعلقات کے فروغ کا خواہاں ہے، پاکستان نے معیشت سمیت تمام شعبوں میں ترقی کی ہے، حکومت کی مناسب پالیسیوں کی بدولت پاکستان کی معیشت صحیح سمت میں گامزن ہے، آزادانہ سرمایہ کار پالیسی کی بدولت پاکستان جنوبی ایشیاء میں سرمایہ کاری کیلئے بہترین ملک ہے جس سے بین الاقوامی سرمایہ کار بھرپور استفادہ کر سکتے ہیں۔ انہوں نے یہ بات جمعرات کو نائیجیریا کے ہائی کمشنر، سوئٹزرلینڈ، متحدہ عرب امارات، بوسنیا ہرزیگوینیا اور مصرکے سفیر وں سے الگ الگ ہونے والی ملاقات میں کہی جنہوں نے ایوانِ صدر میں منعقدہ تقریب میں انہیں اپنی سفارتی اسناد پیش کیں۔ صدر مملکت نے کہا کہ پاکستان تمام دوست اور برادر ممالک کے ساتھ دوطرفہ تعلقات بڑھانے کا خواہاں ہے۔ انہوں نے امید کا اظہار کیا کہ نامزد سفیر دوطرفہ تعلقات خاص طور پر تجارت اور سرمایہ کاری میں اضافہ کیلئے اقدامات کریں گے۔ صدر مملکت نے کہا کہ پاکستان امن کے اصولوں پر کاربند ہے اور بین الاقوامی سطح پر ایک اہم اور ذمہ دار ملک کی حیثیت رکھتا ہے۔ انہوں نے کہا کہ پاکستان دہشت گردی اور انتہاء پسندی سے سب سے زیادہ متاثر ہونے والا ملک ہے اور اس نے دہشت گردی کے خلاف بے پناہ قربانیاں دی ہیں جسے بین الاقوامی برادری کو تسلیم کرنا چاہئے۔ انہوں نے کہا کہ دہشت گردوں کے خلاف بھرپور آپریشن جاری ہے اور آخری دہشت گردکے خاتمہ تک یہ آپریشن جاری رہے گا۔ صدر مملکت نے کہا کہ پاکستان نے معیشت سمیت تمام شعبوں میں ترقی کی ہے۔ انہوں نے کہا کہ حکومت کی مناسب پالیسیوں کی بدولت پاکستان کی معیشت صحیح سمت میں گامزن ہے۔ انہوں نے کہا کہ توانائی اور تعمیرات کے شعبہ میں بڑے منصوبے تکمیل کے آخری مراحل میں ہیں جن کی تکمیل پر پاکستان کی معیشت پر مثبت اثرات مرتب ہوں گے۔ صدر مملکت نے کہا کہ حکومت کی آزادسرمایہ کار پالیسی کی وجہ سے پاکستان جنوبی ایشیاء میں سرمایہ کاری کیلئے بہترین ملک ہے جس سے بین الاقوامی سرمایہ کار بھرپور فائدہ اٹھا سکتے ہیں۔ صدر ممنون حسین نے سفیروں اور ہائی کمشنر کو پاکستان میں ان کی نئی تعیناتی پر مبارکباد دی اور پاکستان میںآرام دہ اور خوشگوار قیام کیلئے نیک خواہشات کا اظہار بھی کیا۔ اس سے قبل نامزد سفارتکاروں کو ایوان صدر کے مرکزی دروازے پر مخصوص بگھی میں لایا گیا۔ اس موقع پر پاکستان اور متعلقہ ممالک کے قومی ترانے بجائے گئے اور گارڈ آف آنر پیش کیا گیا۔ سفارتی اسناد پیش کرنے والوں میں نائیجیریا کے ہائی کمشنر میجر جنرل (ر) اشیمیو ادیبایو اولینی اور سوئٹزرلینڈ کے سفیر تھامس کولی، متحدہ عرب امارات کے حماد عبید ابراہیم سالم الزابی، بوسنیا ہرزیگوینیا کے بریگیڈیئر جنرل (ر) ثاقب فورق اور مصرکے سفیر احمد فضل یعقوب شامل تھے۔