خبرنامہ

لندن (ملت + آئی این پی) وفاقی وزیر داخلہ چوہدری نثار علی خان نے پاک بھارت تعلقات کے بگاڑ کا ذمہ دار بھارت کو قرار دیتے ہوئے کہا ہے کہ بھارت نے خطے کے استحکام کو خطرے میں ڈالتے ہوئے مذاکرات کے دروازے بند کر رکھے ہیں،پاکستان کے اندرونی معاملات میں بھارتی مداخلت خطے کے امن کیلئے بہت بڑا خطرہ ہے، بھارت کی جانب سے پاکستانی سپاہیوں کو شہید کیے جانے کا بھرپور جواب دیا جائے گا، پاکستان بغیر کسی شرط کشمیر کے مسئلے پر بات چیت کرنے کو تیار ہے، افغانستان میں دیرپا امن کے قیام اور استحکام کے لئے پاکستان کی مخلصانہ کاوشوں کے باوجود بھی دوسری طرف کا ردعمل غیر حقیقی شکوک و شبہات اور بے بنیاد الزام تراشی کی روش سے عبارت رہا ہے۔وہ بد ھ کو لندن میں برطانوی وزیر خارجہ بورس جوہنسن سے ملاقات میں گفتگو کر رہے تھے۔ملاقات میں دونوں رہنماؤں نے اس عزم کا اعادہ کیا ہے کہ پاک برطانیہ تعلقات کو مزید مستحکم کرنے، تعلقات کو نئی بلندیوں تک لے جانے اور خطے میں امن کے قیام ک لئے شانہ بشانہ کام کریں گے۔ برطانوی وزیر خارجہ بورس جوہنسن کی جانب سے وزیرِداخلہ چوہدری نثار کیلئے ظہرانے کا بھی اہتمام کیا گیا۔برطانوی وزیر خارجہ سے بات چیت کے دوران وزیرِداخلہ نے کہا کہ پاکستان نے ہمیشہ لندن سے اپنے تعلقات کو اہمیت دی ہے۔ انہوں نے کہا کہ خارجہ پالیسی کے حوالے سے مختلف امور میں دونوں ملکوں کے مقاصد یکساں ہیں۔خطے کی صورتحال پر تبادلہ خیال کرتے ہوئے وزیرِداخلہ کا کہنا تھا کہ بھارت نے خطے کے استحکام کو خطرے میں ڈالتے ہوئے مذاکرات کے دروازے بند کر رکھے ہیں۔ اس موقع پر وزیرِداخلہ نے پاکستان کے اندرونی معاملات میں بھارتی مداخلت کا معاملہ بھی اٹھایا اور اسے خطے کے امن کے لئے بہت بڑا خطرہ اور اشتعال انگیز قرار دیا۔ انہوں نے کہا کہ پاکستان بھارت کے ان ہتھکنڈوں سے مرعوب نہیں ہوگا۔ وزیرِداخلہ نے کہا کہ بغیر کسی اشتعال بھارت کی جانب سے پاکستانی سپاہیوں کو شہید کیے جانے کا بھرپور جواب دیا جائے گا۔وزیرِداخلہ نے واضح طور پر پاک بھارت تعلقات کے بگاڑ کا ذمہ دار بھارت کو قرار دیا۔انہوں نے کہاکہ پاکستان بغیر کسی شرط کشمیر کے مسئلے پر بات چیت کرنے کو تیار ہے ،پاکستان کشمیریوں کے حقوق اور انکی جدو جہد کی حمایت جاری رکھے گا۔ افغانستان کی صورتحال پر بات کرتے ہوئے وزیرِداخلہ نے کہا کہ افغانستان میں دیرپا امن کے قیام اور استحکام کے لئے پاکستان کی مخلصانہ کاوشوں کے باوجود بھی دوسری طرف کا ردعمل غیر حقیقی شکوک و شبہات اور بے بنیاد الزام تراشی کی روش سے عبارت رہا ہے۔ انہوں نے کہا کہ بین الاقوامی برادری کو پر امن افغانستان کے سلسلے میں پاکستان کی کوششوں کو تسلیم کرنا چاہیے کیونکہ یہ خطے کے امن کے مفاد میں ہے۔ برطانوی وزیر خارجہ نے خطے میں امن اور افغانستان کی تعمیر و ترقی کے سلسلے میں پاکستان کی کاوشوں کو سراہا۔