خبرنامہ پاکستان

قاتل پرویز مشرف دلیر ہیں تو عدالتوں کا سامنا کریں، رضا ربانی

جامشورو(ملت آن لائن)چیرمین سینیٹ رضا ربانی نے کہا ہے کہ پرویز مشرف قاتل ہیں اگر وہ دلیر ہیں تو عدالتوں کا سامنا کریں۔

گزشتہ روز سابق صدر پرویز مشرف نے اپنے ویڈیو بیان میں سابق صدر آصف علی زرداری پر الزام عائد کرتے ہوئے کہا تھا کہ بے نظیر بھٹو اور مرتضیٰ بھٹو کے قتل کے ذمہ دار آصف زرداری ہیں۔

جب کہ پرویز مشرف کے بیان پر آصف زرداری نے انہیں شدید تنقید کا نشانہ بناتے ہوئے کہا تھا کہ اگر وہ بہادر ہیں تو پاکستان آکر عدالتوں کا سامنا کریں۔

جامشورو میں میڈیا سے گفتگو کرتے ہوئے رضا ربانی نے سابق صدر پرویز مشرف کے بے نظیر بھٹو کے قتل سے متعلق بیان پر رد عمل میں کہا کہ محترمہ نے مختلف خطوط میں مشرف کے بارے میں لکھا لہٰذا پرویز مشرف قاتل ہیں اور ان کے بارے میں کیا کہوں، وہ لندن اور دبئی میں بیٹھ کر عیاشیاں کررہے ہیں، مشرف اگر دلیر ہیں تو عدالتوں کا سامنا کریں۔

سینیٹ میں انتخابی اصلاحات ترمیمی بل منظور ہونے سے متعلق سوال پر رضا ربانی نے کہا کہ یہ سیاسی سوال ہے چیرمین سینیٹ کی حیثیت سے جواب نہیں دے سکتا۔

چیرمین سینیٹ نے کہا کہ کسی بھی الیکشن کے بعد سیاسی صورتحال بہتر ہوتی ہے، آئین کی حکمرانی نہ ہو اور ادارے کمزور ہوں تو ایسی باتیں ہوتی ہیں، پارلیمان سب سے کمزور ترین ادارہ ہے، آئین کے مطابق پارلیمنٹ کوسب سے زیادہ مضبوط ادارہ ہونا چاہیے۔

واضح رہے کہ راولپنڈی کی انسداد دہشت گردی کی عدالت نے بے نظیر قتل کیس کے فیصلے میں اس وقت کے سی پی او سعود عزیز اور ایس پی خرم شہزاد کو 17،17 سال قید کی سزا سنائی ہے جب کہ 5 ملزمان کو بری اور پرویز مشرف کو اشتہاری قرار دیا ہے۔

پاکستان پیپلزپارٹی کی جانب سے بے نظیر قتل کیس کا فیصلے کو چیلنج بھی کیا گیا ہے۔