ڈاکٹر یاسمین راشد کا الیکشن کمیشن کے خلاف عدالت جانے کا اعلان
لاہور(ملت آن لائن)این اے 120 ضمنی انتخاب میں پاکستان تحریک انصاف کی امیدوار یاسمین راشد نے الیکشن کمیشن کے خلاف عدالت جانے کا اعلان کیا ہے۔
لاہور میں صحافیوں سے گفتگو کرتے ہوئے یاسمین راشد نے کہا کہ فی الحال کسی چیز پر تبصرہ نہیں کرنا چاہتی، الیکشن کا دن پرسکون رہنے پر فوج اور میڈیا کا شکریہ ادار کرتی ہوں، فوج کی وجہ سے لوگ پرسکون رہے اور آرام سے ووٹ ڈالا۔ ان کا کہنا تھا کہ آج کے نتائج پر 29 ہزار ووٹوں کا سایہ پڑا ہوا ہے،اس معاملے کو ایسے نہیں چھوڑیں گے بلکہ آخری دم تک اس کا پیچھا کریں گے اور الیکشن کمیشن کے خلاف عدالت ضرور جاؤں گی۔
یاسمین راشد نے کہا کہ پچھلی بار پولنگ اسٹیشنز میں (ن) لیگ کے لوگ گھس جاتے تھے اس بار ایسا نہیں ہوا۔ انہوں نے کہا کہ ہماری خواہش ہے الیکشن ہمیشہ صاف اور شفاف ہوں کیونکہ غلط طریقے سے جیتا گیا الیکشن جمہوریت کو مضبوط کرنے کے بجائے کمزور کرتا ہے۔
پاکستان تحریک انصاف کے سربراہ عمران خان نے کہا ہے کہ لاہور کے حلقہ این اے 120 میں ڈاکٹر یاسمین راشد نےحکومت،ن لیگ اوراس کے فنڈز کا بھرپور مقابلہ کیا جس پر وہ انہیں خراج تحسین پیش کرتے ہیں۔
سابق وزیراعظم نواز شریف کی نااہلی کے بعد خالی ہونے والی نشست پر ضمنی انتخابات اتوار کو ہوئے جس میں پاکستان مسلم لیگ (ن) کی امیدوار کلثوم نواز اور پاکستان تحریک انصاف کی امیدوار ڈاکٹر یاسمین راشد تھیں۔
اگرچہ اس انتخاب میں پیپلز پارٹی سمیت دیگر کئی جماعتوں کے امیدوار بھی میدان میں تھے تاہم بنیادی مقابلہ کلثوم نواز اور ڈاکٹر یاسمین راشد کے درمیان تھا۔