اسلام آباد(ملت آن لائن)میاں نواز شریف کی صاحبزادی مریم نواز نے سپریم کورٹ کے فیصلے پر اپنے رد عمل کا اظہار کرتے ہوئے کہا ہےکہ ایک اور منتخب وزیر اعظم کو گھر بھیج دیا گیا۔
مریم نواز نے پاناما کیس کے فیصلے پر سماجی رابطے کی ویب سائٹ ٹوئٹر پر اپنے رد عمل کا اظہار کیا۔
ان کا کہنا تھا کہ آج ایک اور منتخب وزیر اعظم کو گھر بھیج دیا گیا لیکن ہم بھرپور طاقت اور قوت کے ساتھ انہیں (نوازشریف) کو واپس دیکھیں گے اور پاکستان مسلم لیگ (ن) مزید مضبوط ہوگی۔
ایک اور ٹوئٹ میں مریم نواز نے کہا کہ آج نواز شریف کی 2018 کے الیکشن میں جیت کے لیے راہ ہموار ہوگئی ہے جسے ان کو روکنا مشکل ہے، روک سکتے ہو تو روک لو۔
واضح رہے کہ سپریم کورٹ نے پاناما کیس کے فیصلے میں نوازشریف کو نااہل قرار دیا ہے جس کے بعد نوازشریف وزارت عظمیٰ کے عہدے سے سبکدوش ہوگئے اور کابینہ بھی تحلیل ہوچکی ہے۔
سپریم کورٹ کی جانب سے پاناما کیس میں وزیر اعظم نواز شریف کو ناہل قرار دینے کا فیصلہ سوشل میڈیا ویب سائٹ ٹویٹر پر ہیش ٹیگ Panama Verdict کے ساتھ ہی دنیا بھر میں ٹاپ ٹرینڈ بن گیا ہے۔
پاکستانی قوم جس بے چینی سے پاناما کیس کے فیصلے کا انتظار کررہی تھی اس کا اندازہ اس بات سے بھی لگایا جاسکتا ہے کہ ہر سیکنڈ میں اس ہیش ٹیگ کے ساتھ 20 ٹویٹس کی جارہی تھیں۔ قبل ازیں آج صبح سے ہی پاکستان مسلم لیگ (ن) اور پاکستان تحریک انصاف کے حامیوں کے درمیان ٹویٹر پر گرما گرم بحث جاری تھی؛ اور دونوں پارٹیوں کے حامی اپنی اپنی سیاسی جماعتوں کے حق میں فیصلہ آنے کا دعویٰ کرتے رہے۔
تاہم فیصلہ آنے کے بعد ٹویٹر صارفین کی جانب سے مختلف ردعمل سامنے آرہے ہیں۔ ایک صارف نے ٹویٹ کرتے ہوئے لکھا کہ بالآخر برسوں بعد عمران خان کا نعرہ ’’گو نواز گو‘‘ سچ ثابت ہوگیا، اور یہ کہنے کا وقت آگیا ہے کہ ’’گون نوازگون‘‘۔
ایک اور صارف نے پوری قوم کو مبارکباد دیتے ہوئے لکھا کہ پاناما کا فیصلہ ملکی صورتحال کو بہتر بنانے میں بہت مددگار ثابت ہوگا۔
جبکہ ایک اور صارف نے لکھا کہ یہ صرف جمہوریت میں ہی ممکن ہے، یہ ہمارے جمہوری نظام کی جیت ہے۔
ایک صارف نے پاکستانی عدلیہ پر فخر کرتے ہوئے پاکستان زندہ باد کا نعرہ لگایا۔
فاطمہ نامی ٹویٹر صارف نے لکھا کہ یہ آج کی سب سے اچھی خبر ہے۔