اسلام آباد(ملت آن لائن)وزیراعظم کےصاحبزادے حسین نواز چھٹی بار جے آئی کے روبرو پیش ہوگئے۔ حسین نواز کی جے آئی ٹی میں پیشی پر ن لیگ کے کارکنوں کی بڑی تعداد فیڈرل جوڈیشل اکیڈمی موجود تھی۔
اس موقع پرحسین نواز کی سیکورٹی وی وی آئی پی ون قراردی گئی ہے۔ فیڈرل جوڈیشل اکیڈمی کےاطراف میں سیکورٹی کےغیرمعمولی انتظامات کئے گئے ہیں،اطراف میں لگائی گئی سیکورٹی باڑ میں اضافہ اورآئی ایٹ پل سےفیڈرل جوڈیشل اکیڈمی جانے والاراستہ بھی بندکیا گیا ہے۔
وزیراعظم کےصاحبزادے حسین نواز کی آج جے آئی ٹی میں چھٹی پیشی ہے، حسین نواز پہلی بار 28 مئی ، دوسری بار 30 مئی ،تیسری بار یکم جون ، چوتھی مرتبہ 3جون جبکہ پانچویں بار 9جون کو مشترکہ تحقیقاتی ٹیم کے روبرو پیش ہوچکے ہیں۔
جب کہ وزیراعظم نواز شریف نے بھی 15 جون کو ‘جے آئی ٹی کے سامنے پیش ہو کر لگ بھگ تین گھنٹے تک سوالات کے جوابات دیئے تھے۔
اس سے قبل وزیراعظم نواز شریف کے چھوٹے بیٹے حسن نواز تین مرتبہ ‘جے آئی ٹی کے سامنے پیش ہو چکے ہیں۔
شریف خاندان سے تعلق رکھنے والے دیگر افراد کے علاوہ وزیراعلیٰ پنجاب شہباز شریف اور مریم نواز کے شوہر کیپٹن (ریٹائرڈ) صفدر اور وزیرخزانہ اسحاق ڈاربھی ‘جے آئی ٹی کے روبرو پیش ہوچکے ہیں۔
سپریم کورٹ نے 20 اپریل کو پاناما پیپرز کی تحقیقات کیلئے مشترکہ تحقیقاتی ٹیم تشکیل دینے کا حکم دیا تھا۔
واضح رہے کہ سپریم کورٹ نے ‘جے آئی ٹی کو اپنی تحقیقات مکمل کرنے کے لیے 60 روز کا وقت دیا تھا اور گزشتہ ہفتے عدالت عظمٰی کی طرف سے مشترکہ تحقیقاتی ٹیم سے کہا گیا تھا کہ وہ اپنی حتمی رپورٹ 10 جولائی کو عدالت میں جمع کرائے۔