پانامہ لیکس

اسلام آباد(ملت + آئی این پی) سپریم کورٹ نے پاکستان تحریک انصاف کے چیئرمین عمران خان اور جنرل سیکرٹری جہانگیر ترین کے خلاف آف شور کمپنیاں بنانے سے متعلق کیس میں وفاق اور الیکشن کمیشن کو نوٹس جاری کرتے ہوئے سماعت 30نومبر تک ملتوی کردی۔ بدھ کو سپریم کورٹ کے جسٹس ثاقب نثار کی سربراہی میں تین رکنی بینچ نے مسلم لیگ (ن) کے مرکزی رہنما حنیف عباسی کی عمران خان اور جہانگیر ترین کے خلاف آف شور کمپنیاں بنانے سے متعلق درخواست کی سماعت کی۔ اس موقع پر حنیف عباسی کے وکیل اکرم شیخ نے عدالت سے استدعا کی کہ حنیف عباسی کا کیس لارجر بینچ کو بھیج دیں جس پر عدالت نے اکرم شیخ کی استدعا مسترد کردی۔ عدالت نے قرار دیا کہ چیف جسٹس کی سربراہی میں پانچ رکنی لارجر بینچ پہلے ہی اس معاملے کی سماعت کررہا ہے۔ اس موقع پر عمران خان کے وکیل نعیم بخاری نے دلائل دیتے ہوئے کہا کہ کیس میں عمران خان کی جانب سے حامد خان پیش ہورہے تھے۔ میڈیا کے ذریعے پتہ چلا کہ میں وکیل مقرر ہوگیا ہوں۔ انہوں نے کہا کہ مجھے پتہ بھی نہیں تھا کہ میرا وکالت نامہ جمع ہوگیا ہے۔ اب وکیل مقرر ہوگیا ہوں تو مجھے جواب داخل کرنے کے لئے وقت دیا جائے جس پر عدالت نے تحریک انصاف کے وکیل کو جواب جمع کرانے کیلئے وقت دیدیا۔ وفاق اور الیکشن کمیشن کو نوٹس جاری کرتے ہوئے سماعت 30نومبر تک ملتوی کردی۔