پانامہ لیکس

اسلام آباد:(اے پی پی)وفاقی وزیر بے نظیر انکم سپورٹ پروگرام کی چیئرپرسن ماروی میمن نے کہا ہے کہ حکومت اور فوج ایک پیج پر ہیں‘ پانامہ لیکس پر اپوزیشن خود تاخیر کر رہی ہے‘ آپریشن ضرب عضب کو قوم اور تمام سیاسی جماعتوں نے سپورٹ کیا۔ بدھ کو پارلیمنٹ ہاؤس کے باہر میڈیا سے گفتگو کرتے ہوئے انہوں نے کہا کہ پانامہ لیکس کے مسئلہ پر جتنی پیش رفت وزیراعظم نے دکھائی کوئی اورنہیں دکھا سکتا۔ پانامہ لیکس کی تحقیقات کے حوالے سے تاخیر کی ذمہ دار خود اپوزیشن ہے۔ انہوں نے کہا کہ حکومت نے جو ٹی او آرز پانامہ کے حوالے سے بنائے ہیں وہ اپوزیشن کے ٹی او آرز سے زیادہ بہتر ہیں۔ انہوں نے کہا کہ حکومت اور فوج ایک پیج پر ہیں۔ وزیراعظم اور آرمی چیف کی ملاقات معمول کے مطابق ہوتی رہتی ہے بڑی بات نہیں۔ وفاقی وزیر نے کہا کہ ملک میں دہشت گردوں کے خلاف جاری آپریشن ضرب عضب کو پوری قوم اور تمام سیاسی جماعتوں نے سپورٹ کیا جس کی وجہ سے آج ملک میں دہشت گردی کا خاتمہ کیا جارہا ہے۔