پانامہ لیکس

اسلام آباد (آئی این پی) پاناما لیکس کی تحقیقات کیلئے ٹی او آرز بنانے کیلئے قومی اسمبلی نے چھ کے بجائے آٹھ آٹھ ارکان پر مشتمل پارلیمانی کمیٹی کے قیام کی تحریک منظور کرلی ، اپوزیشن کا احتجاج ، حکومت معاہدے کی پاسداری کرے ، 8 ارکان کی کمیٹی مسترد کر دی ۔ قومی اسمبلی میں وزیر قانون زاہد حامد کی جانب سے پیش کی جانے والی تحریک متفقہ طور پر منظور کرلی گئی ہے ۔ اسمبلی نے 12 کے بجائے 16ارکان کی پارلیمانی کمیٹی کی منظوری دی ، کمیٹی میں اپوزیشن اور حکومت کے 8 ، 8 ارکان شامل ہونگے ۔ اپوزیشن نے تحریک منظور کئے جانے پر شدید احتجاج کیا اور تحریک مسترد کر دی ۔ اپوزیشن لیڈر خورشید شاہ نے کہا کہ حکومت نے کس سے پوچھ کر 8 ارکان پر مشتمل کمیٹی کی منظوری دی ۔ یہ کمیٹی قابل قبول نہیں ۔ شاہ محمود قریشی نے کہا کہ 6 ارکان کی کمیٹی کے قیام پر کل معاہدہ ہوا تھا جس قرارداد پر دستخط ہوئے تھے وہی آج منظور کرائی جائے ۔ اسحاق ڈار نے کہا کہ اپوزیشن 6،6 ارکان کی کمیٹی چاہتی ہے تو کوئی اعتراض نہیں ۔