پانامہ کیس فیصلہ ، تحریک انصاف نے کل کے احتجاج کی کال منسوخ کر دی
تحریک انصاف نے کل وزیر اعظم کے استعفیٰ کیلئے علامتی احتجاج کا اعلان کر رکھا تھا۔
اسلام آباد: (دنیا نیوز) پاکستان تحریک انصاف نے کل وزیر اعظم کے استعفیٰ کے دباؤ کیلئے علامتی احتجاج کرنا تھا تاہم تحریک انصاف کی قیادت اب کل سپریم کورٹ کا فیصلہ سننے کے بعد آئندہ لائحہ عمل طے کرے گی۔ اس سے قبل پی ٹی آئی کیجانب سے فیصلہ کیا گیا تھا کہ وزیر اعظم کے استعفے کیلئے دباؤ بڑھانے کیلئے عوام کو میدان میں لایا جائے گا، اور اس سلسلے میں تحریک انصاف نے ملک بھر میں جمعہ سے علامتی احتجاج کی کال دے رکھی تھی۔
…………….
پانامہ کیس کا فیصلہ کل صبح ساڑھے گیارہ بجے سنایا جائے گا
بڑا اعلان سامنے آ گیا، پانامہ کیس کا فیصلہ کل صبح ساڑھے گیارہ بجے سنایا جائے گا۔
اسلام آباد: (دنیا نیوز) بڑی عدالت سے بڑی خبر آ گئی۔ پانامہ کیس کا محفوظ فیصلہ کل صبح ساڑھے گیارہ بجے سنا دیا جائے گا۔ عدالت عظمیٰ نے یہ فیصلہ 21 جولائی کو محفوظ کیا تھا۔ ذرائع کے مطابق، آج صبح سے ہی سکیورٹی اداروں نے پانامہ کیس کا فیصلہ جلد آنے کے امکان کے پیشِ نظر عدالتِ عظمیٰ کے اردگرد سخت سکیورٹی انتظامات شروع کر دیئے تھے۔ تاہم ابھی یہ معلوم نہیں کہ کل سنایا جانے والا فیصلہ مختصر ہو گا یا مفصل۔ سپریم کورٹ کا پانچ رکنی لارجر بنچ فیصلہ سنائے گا۔ عدالت عظمیٰ وزیرِ اعظم کی آرٹیکل 62 اور 63 کے تحت نااہلی یا عدم نااہلی پر فیصلہ دے گی۔ فیصلہ سپریم کورٹ کا پانچ رکنی بنچ جسٹس آصف سعید کھوسہ، جسٹس اعجاز افضل، جسٹس اعجاز الاحسن، جسٹس گلزار اور جسٹس عظمت سعید پر مشتمل ہے۔ پانامہ کیس کے فیصلے کے موقع پر وفاقی دارالحکومت میں ریڈ الرٹ ہے۔ متعلقہ اداروں کو سکیورٹی انتظامات کی ہدایت کر دی گئی ہے۔ پولیس کی بھاری نفری ریڈ زون پہنچ گئی ہے۔ رینجرز اور ایف سی کے دستے بھی سکیورٹی فرائض سرانجام دیں گے۔