اسحاق ڈار پر لگنے والے الزامات مذاق ہیں، رانا ثنااللہ
لاہور(ملت آن لائن)وزیر قانون پنجاب رانا ثنااللہ نے وزیر خزانہ اسحاق ڈار پر عائد الزامات کو مذاق قرار دے دیا۔
اسلام آباد کی احتساب عدالت نے وزیر خزانہ اسحاق کے خلاف آمدن سے زائد اثاثوں کے نیب ریفرنس پر فرد جرم عائد کردی ہے تاہم اسحاق ڈار نے صحت جرم سے انکار کردیا۔
وزیر خزانہ اسحاق ڈار پر فرد جرم عائد ہونے کے بعد اپنے رد عمل میں وزیر قانون پنجاب رانا ثنااللہ نے کہا کہ اسحاق ڈار پر لگنے والے الزامات مذاق ہیں، ان پرالزام کا کوئی قانونی جواز اور بنیاد ہونی چاہیے۔
صوبائی وزیر قانون کا کہنا تھا کہ سپریم کورٹ نے 70 سال کی تاریخ میں کبھی جے آئی ٹی نہیں بنائی۔
تحریک انصاف کے رہنما شاہ محمود قریشی نے فرد جرم عائد ہونے کے بعد وزیر خزانہ سے فوری مستعفی ہونے کا مطالبہ کردیا ہے۔
شاہ محمود قریشی کا کہنا تھا کہ اسحاق ڈار پارٹی اور ملکی معیشت کے مفاد میں استعفیٰ دیں کیونکہ وہ کیس پر دھیان دیں گے یا قلمدان پر۔
دوسری جانب عوامی مسلم لیگ کے سربراہ شیخ رشید کا کہنا تھا کہ بعض لوگوں کوعزت نہیں دولت عزیز ہوتی ہے، ان لوگوں نےملک میں جمہوریت کا ستیاناس کردیا ہے۔
شیخ رشید کا کہنا تھا کہ حدیبیہ کیس کا سات،آٹھ دن میں فیصلہ آنا ہے اور سب سے گہرے پانی میں اسحاق ڈار ہیں۔