پنجاب حکومت

لاہور۔21 اکتوبر(ملت + اے پی پی )وزیراعلیٰ پنجاب محمد شہبازشریف سے امریکہ کے معاون وزیر برائے بین الاقوامی انسداد منشیات و امور نفاذ قانون ،ولیم آر براؤن فیلڈنے ملاقات کی اورامریکی وزیر نے وزیراعلیٰ شہبازشریف کو پنجاب پولیس کی جدید خطوط پر تربیت اوراستعدادکار میں مزید اضافے کیلئے ہر ممکن تعاون فراہم کرنے کی یقین دہانی کرائی۔امریکی معاون وزیرنے انفارمیشن ٹیکنالوجی کے ذریعے پنجاب پولیس میں اصلاحات لانے کیلئے شاندار اقدامات پروزیراعلیٰ شہباز شریف کے ویژن کی تعریف کرتے ہوئے کہا کہ وزیراعلیٰ شہباز شریف پولیس کی تربیت اوراستعداد کار میں اضافے کیلئے جیسا تعاون کہیں گے فراہم کریں گے۔وزیراعلیٰ کی قیادت میں انفارمیشن ٹیکنالوجی کے ذریعے پنجاب پولیس کو بہتر بنانے کیلئے بے مثال اقدامات اٹھائے گئے ہیں ۔انہوں نے کہا کہ میں دنیا کے 90سے زائد پولیس ہیڈ کوارٹر ز کا دورہ کرچکا ہوں لیکن پنجاب پولیس کے ہیڈ کوارٹر کے دورے کے بعد اس نتیجہ پر پہنچا ہوں کہ یہاں انتہائی اعلیٰ معیار کا کام ہورہا ہے،خصوصاً انفارمیشن کے ذریعے پنجاب میں پولیسنگ کے نظام کی بہتری کیلئے جوجدت اپنائی گئی ہے وہ لائق تحسین ہے۔ پنجاب پولیس کا ہیڈ کوارٹر لاس اینجلس،شگاگواوردیگر ہیڈ کوارٹرزکی طرح اعلیٰ معیار کا ہے اور پنجاب پولیس کو جدید فورس بنانے کا کریڈٹ وزیراعلیٰ شہبازشریف اوران کی پوری ٹیم کو جاتا ہے۔انہوں نے کہا کہ پنجاب پولیس کی کارکردگی پاکستان کے دیگر صوبوں کے مقابلے میں بہترین اورشاندار ہے۔انہوں نے کہا کہ مجھے خوشی ہے کہ آپ نے انفارمیشن ٹیکنالوجی کے ذریعے پنجاب پولیس کو نیا چہرہ دیا ہے ۔پولیس کومزید جدید خطوط پر تربیت دینے اورہائی سکیورٹی جیل کے حوالے سے امریکہ ہر طرح کی تکنیکی معاونت فرا ہم کرے گا۔انہوں نے کہا کہ شہبازشریف کی قیادت میں پنجاب پولیس بہترین سروسز فراہم کرنے والی فورس بن چکی ہے۔وزیراعلیٰ پنجاب محمد شہبازشریف نے اس موقع پر گفتگو کرتے ہوئے کہا کہ گزشتہ ساڑھے تین برس کے دوران دہشت گردی وانتہاء پسندی اورتوانائی بحران پر قابوپانے کیلئے بے پناہ محنت سے کام کیاہے ۔دہشت گردی کیخلاف جنگ میں پاکستانی قوم کا عزم پہاڑ سے بھی زیادہ بلند اور مضبوط ہے ۔پاکستان کی مسلح افواج ،پولیس اور عام شہریوں نے دہشت گردی کیخلاف جنگ میں عظیم قربانیاں دی ہیں اوردہشت گردی کیخلاف جنگ پاکستان کے بقاء کی جنگ ہے ۔قوم کے اتحاد کی طاقت سے پرامن پاکستان کے قیام کی یہ جنگ ہر صورت جیتیں گے۔آپریشن ضرب عضب نے دہشت گردوں اوران کے سہولت کاروں کی کمر توڑ دی ہے ۔انہوں نے کہا کہ انتہاء پسندانہ رجحانات کے خاتمے کیلئے بندوق کی گولی کیساتھ تعلیم ،صحت اورروزگا رکی گولیاں بھی ضروری ہیں۔پاکستان کو محفوظ اورپرامن بنانے کی منزل ہر صورت حاصل کریں گے۔انہوں نے کہا کہ توانائی بحران پر قابو پانے کیلئے متعدد منصوبوں پر تیزرفتاری سے عملدرآمد جاری ہے ۔آئندہ ڈیڑھ برس کے دوران لوڈ شیڈنگ کا خاتمہ ہوگااورروشن پاکستان کی منزل حاصل کرلیں گے۔پنجاب حکومت نے دہشت گردی کے خاتمے کیلئے پاکستان کی پہلی انسداد دہشت گردی فورس تشکیل دی ہے اورجرائم کے خاتمے کیلئے ڈولفن فورس بھی میدان میں عمل میں آچکی ہے ۔انہوں نے کہا کہ پنجاب حکومت نے جنوبی ایشیاء کا سب سے بڑا سیف سٹی پراجیکٹ بنایا ہے ۔لاہور کے بعد سیف سٹی پراجیکٹ کو صوبے کے دیگر چھ بڑے شہروں تک وسعت دی جائے گی۔سیف سٹی پراجیکٹ کے ذریعے شہروں کو محفوظ بنائیں گے ۔وزیراعلیٰ نے کہا کہ تعلیم ،صحت اوردیگر سماجی شعبوں کی بہتری کیلئے انقلابی اصلاحات کے مثبت نتائج سامنے آئے ہیں ۔شفافیت پنجاب حکومت کا طرۂ امتیاز ہے ۔انہوں نے کہا کہ امریکہ کی جانب سے ایلیٹ پولیس ٹریننگ سکول میں پولیس کی تربیت میں تکنیکی معاونت اورہائی سکیورٹی جیل کیلئے تعاون کا خیر مقدم کریں گے۔پنجاب حکومت نے پولیس کو عوام کی توقعات پر پورا اترنے کیلئے ہر طرح کے وسائل فراہم کیے ہیں ۔پولیس نظام میں انفارمیشن ٹیکنالوجی کے ذریعے جدت لائی گئی ہے ۔جدید ٹیکنالوجی سے نہ صرف دہشت گردی بلکہ جرائم پر قابو پانے کے حوالے سے خاطر خواہ مدد ملی ہے ۔انہوں نے کہا کہ پاکستان اورامریکہ کے درمیان کثیر الجہتی نوعیت کے تعلقات موجود ہیں اوران تعلقات کو مزید موثر انداز میں وسعت دینے کی ضرورت ہے ۔لاہور میں امریکی قونصل جنرل یوری فیڈکیو ، صوبائی وزیر قانون رانا ثناء اللہ، معاون خصوصی رانامقبول احمد،انسپکٹر جنرل پولیس، سیکرٹری داخلہ، سیکرٹری پراسیکیوشن اور متعلقہ حکام بھی اس موقع پرموجود تھے۔