پنجاب حکومت

ملتان (ملت + آئی این پی) گورنر پنجاب ملک محمد رفیق رجوانہ نے کہا ہے کہ حکومت عوامی فلاح و بہبود کے منصو بوں پر خصوصی توجہ دے رہی ہے۔لوگوں کے مسائل حل کر نے کیلئے تمام وسائل بروئے کار لائے جا رہے ہیں۔صحت،تعلیم ،صاف پانی کی فراہمی اولین ترجیحات ہیں۔ وہ اتوار کو سرکٹ ہائوس ملتان میں مختلف وفود سے گفتگو کر رہے تھے۔اس موقع پر سابقہ ایم این اے شیخ طارق رشید ،چیئر مین یو نین کونسل ملک اعجاز احمد رجوانہ، جلیل خان بابر ،اختر عالم قریشی، ملک انور علی ،فیاض خان اور دیگر سیاسی و سماجی راہنما بھی موجود تھے۔گورنر پنجاب ملک محمد رفیق رجوانہ نے کہا ہے کہ پاکستان ترقی کی راہ پر گامزن ہے۔ سی پیک سے ملکی معیشت مضبوط ہو گی۔اقتصادی سرگرمیوں میں اضافہ ہو گا۔ روز گار کے بے شمار مواقع پیدا ہو رہے ہیں۔انہوں نے کہا کہ ہمیں اپنے نو جوانوں کو جدید تعلیم سے آراستہ کر نا ہے تاکہ وہ ملکی تعمیر و ترقی میں بہترین کردار ادا کر سکیں۔ انہوں نے مزید کہا کہ ہم لو گوں کی خدمت کر نے پر یقین رکھتے ہیں اسی سے اللہ کی خوشنودی اور رضا حاصل کی جا سکتی ہے۔گورنر نے کہا کہ ملتان کے مسائل کر نے کے لئے جامع حکمت عملی اختیار کی جا رہی ہے۔ ملتان کے سیوریج کیلئے ماسٹر پلان مرتب کیا جا رہا ہے۔جس سے سیوریج کا مسئلہ حل ہو جائے گا۔اس موقع پر گورنر پنجاب نے مختلف لوگوں کے مسائل سنیں اور ان کے حل کے لئے احکامات جاری کئے۔