پنجاب حکومت

لاہور (ملت + آئی این پی) وزیر اعلی پنجاب محمد شہباز شریف نے کہا ہے کہ پاکستان آج اس منزل کی جانب بڑھ رہا ہے جس کا خواب قائدؒ اور اقبالؒ نے دیکھا تھااورگزشتہ ساڑھے تین برس کے دوران جس محنت سے منصوبوں کو آگے بڑھایا گیا ہے۔ وہ جمعرات کو اراکین اسمبلی سے گفتگوکر رہے تھے،وزیر اعلی سے ملاقات کرنے والوں میں رکن قومی اسمبلی عرفان ڈوگراور رکن پنجاب اسمبلی افتخارحسین چھچھر شامل تھے۔رکن صوبائی اسمبلی منشاء اللہ بٹ بھی اس موقع پر موجود تھے ۔وزیر اعلیٰ نے کہا کہ پاکستان کی 70 سالہ تاریخ میں اس کی مثال نہیں ملتی اور یہ بات پوری قوم جانتی ہے کہ جس ملک میں منصوبے شروع ہو کر ختم ہونے کا نام نہ لیں وہاں پر آج انتہائی کم عرصے میں پراجیکٹ مکمل ہو رہے ہیں اور اس کا کریڈٹ پاکستان مسلم لیگ (ن) کی محنت، امانت، دیانت اور شفافیت پر مبنی پالیسی کو جاتا ہے جس کی آج نہ صرف ملکی سطح پر بلکہ بین الاقوامی طور پر بھی بھرپور ستائش کی جا رہی ہے ۔ انہوں نے کہا کہ خوشحال، ترقی یافتہ ، پرامن ، محفوظ اور معاشی طور پر مستحکم پاکستان ہماری منزل ہے اورتیزی سے ترقی کرتا ہوا پاکستان اپنی یہ منزل ضرور حاصل کرے گا۔انہوں نے کہا کہ ملک کو دھرنوں کی ضرورت ہے نہ منفی سیاست کی اور یہی وجہ ہے کہ قوم کے اندرنفاق کا بیج بونے کی کوشش کرنے والے بعض سیاسی عناصر اپنی منفی سیاست کے باعث آج تنہا ہو چکے ہیں اورعوام نے اپنے اتحاد کی طاقت سے ان عناصر کی انتشار کی سیاست کو مسترد کر دیا ہے ۔ انہوں نے کہا کہ اتحاد اور اتفا ق میں جو برکت ہے اسی کے باعث پاکستان کی باصلاحیت قوم ترقی اور خوشحالی کا سفر طے کرے گی اوردھرنا دینے والے ہمیشہ کی طرح ناکام رہیں گے اور پاکستان آگے بڑھے گا۔