پنجاب حکومت

زرداری اور عمران طاہر القادری کے دائیں بائیں ہوں گے: چودھری منظور

لاہور: (ملت آن لائن) پیپلز پارٹی وسطی پنجاب کے صدر قمر الزمان کائرہ نے کہا ہے کہ پنجاب کے حکمرانوں کو بھرپور احتجاج سے عہدے چھوڑنے پر مجبور کریں گے، ڈرنے والے ہیں نہ جھکنے والے، طاقت کا استعمال ہوا تو جواب دینا جانتے ہیں۔ چودھری منظور کہتے ہیں 17 جنوری کو آصف زرداری اور عمران خان طاہر القادری کے دائیں بائیں ہوں گے۔ 17 جنوری کو مال روڈ پر متحدہ اپوزیشن کے احتجاج کی تیاریوں کا جائزہ لینے کے لئے پیپلز پارٹی کا اجلاس ہوا۔ اجلاس کو بریفنگ دیتے ہوئے قمر الزمان کائرہ بولے کہ پیپلز پارٹی احتجاج میں بھرپور شرکت کرے گی، آئینی اور قانونی جد و جہد کے نتیجہ میں حکمرانوں کو سانحہ ماڈل ٹاون کا حساب دینا ہو گا۔ انہوں نے کہا کہ پنجاب کے حکمرانوں کو مجبور کریں گے کہ وہ اپنے عہدوں سے الگ ہوں اور نجفی رپورٹ کی روشنی میں ذمہ داروں کو سزا دی جائے۔ قمر الزمان کائرہ کا کہنا تھا کہ حکمران لاتوں کے بھوت ہیں، باتوں سے نہیں مانتے لیکن خاموشی کی بھی ایک زبان ہوتی ہے، اگر حکومت نے طاقت کے استعمال کی کوشش کی تو پیپلز پارٹی کو مقابلہ کرنا اور جواب دینا آتا ہے۔ پیپلز پارٹی کے رہنماء چودھری منظور کا کہنا تھا کہ حکمران کس قدر بہادر ہیں قصور میں پتہ چل گیا، یہ تو دن کی روشنی میں زینب کے گھر بھی نہیں جا سکے۔ چودھری منظور نے یہ بھی بتا دیا کہ مال روڑ پر عمران خان اور آصف زرداری ایک ہی کنٹینر پر ہوں گے۔ ان کا کہنا تھا کہ طاہر القادری زردای اور عمران خان کے درمیان میں ہوں گے۔ پیپلز پارٹی کی قیادت کا کہنا تھا کہ 16 جنوری کو دوبارہ اجلاس ہو گا جس میں احتجاج سے متعلق حتمی فیصلے کئے جائیں گے۔