سیاسی سموگ پیدا کی جارہی ہے، سعد رفیق
لاہور: (ملت آن لائن) وفاقی وزیر ریلوے خواجہ سعد رفیق نے کہا ہے کہ سیاسی ماحول کو آلودہ کرنے کے لیے سیاسی سموگ پیدا کی جارہی ہے، پی ٹی آئی اور پیپلزپارٹی مسلسل گندا کھیل کھیل رہی ہے، ترمیم کیلئے پی ٹی آئی اور پیپلزپارٹی کو تعاون کرنا ہوگا، ہر وقت انتخابات کے لیے آئینی ترمیم ضروری ہے۔پیر کو خواجہ سعد رفیق نے سماجی رابطوں کی ویب سائٹ پر اپنے ٹویٹ میں کہا کہ بروقت انتخابات کے لیے آئینی ترمیم ضروری ہے، آئینی ترمیم کے لیے پی ٹی آئی اور پیپلزپارٹی کو تعاون کرنا ہوگا،نئی مردمم شماری کے بعد آئینی ترمیم ضروری ہے، نئی حلقہ بندیوں کے لیے مل کر ترمیم کرنا ہوگی، سیاسی ماحول کو آلودہ کرنے کے لیے سیاسی سموگ پیدا کی جارہی ہے۔ پی ٹی آئی اور پیپلزپارٹی مسلسل گندا کھیل کھیل رہی ہے۔
وفاقی وزیر داخلہ احسن اقبال کا کہنا ہے کہ اگر پرانی مردم شماری پر 2018 کے عام انتخابات ہوئے تو آئینی پیچیدگیاں پیدا ہوں گی۔ وفاقی وزیرداخلہ کا کہنا تھا کہ مردم شماری ہوچکی ہے اور خیبرپختون خوا و بلوچستان کی نشستیں بھی بڑھ چکی ہیں جب کہ پنجاب کی کم ہوگئی ہیں، اس لیے آئندہ انتخابات نئے مردم شماری پر ہی کرانے ہوں گے اور اگر پرانی مردم شماری پر انتخابات ہوئے تو آئینی بحران پیدا ہوجائے گا۔ احسن اقبال کا کہنا تھا کہ پرانی مردم شماری پر الیکشن سے سیاسی تنازعات سراٹھائیں گے، اس لیے سب جماعتوں کو چاہئے کہ مل کر بیٹھیں اور اتفاق رائے سے حلقہ بندیوں سے متعلق آئینی بل کو منظور کرائیں تاکہ 2018 کے عام انتخابات مقررہ وقت پر ہو سکیں، جمہوری تسلسل کے لئے تمام سیاسی جماعتوں کو ذمہ داری کا مظاہرہ کرنا ہوگا۔