پنجاب حکومت

علامہ محمد اقبالؒ کے مزار پر پاک بحریہ نے ذمہ داریاں سنبھال لیں
اسلام آباد: (ملت آن لائن) مصورپاکستان اورقومی شاعر ڈاکٹر علامہ محمد اقبال ؒ کے 140ویں یوم پیدائش کے موقع پر مزار اقبال پر اعزازی گارڈ کی تبدیلی کی پروقار تقریب منعقد ہوئی۔ سفید وردی میں ملبوس پاک بحریہ کے چاق و چوبند دستے نے روایتی جوش وخروش اورجذبے کے ساتھ مزار اقبال کے اعزازی گارڈ کی ذمہ داریاں سنبھالیں۔ پاک بحریہ اور پاکستان رینجرز کے دستوں نے مزار اقبال کے باہراپنی اپنی پوزیشنز سنبھالیں۔ سٹیشن کمانڈر (نیوی)لاہور، کموڈورڈاکٹر ساجد محمود شہزاد نے پاکستان نیوی کے دستے اوراعزازی گارڈ کے فرائض سرانجام دینے والے پاک رینجرز کے دستوں کا معائنہ کیا ۔بینڈ کی دھن پر مخصوص انداز سے چلتے ہوئے پاکستان نیوی کے دستے نے مزار اقبال کے چاروں کونوں میں اپنی پوزیشنز سنبھالیں جبکہ پاک رینجرز کا دستہ روایتی انداز میں مزار سے رخصت ہوا۔ اعزازی گارڈ کی تبدیلی کے بعد سٹیشن کمانڈر (نیوی)لاہورنے چیف آف دی نیول سٹاف، پاکستان نیوی کے آفیسرز اور سی پی اوز/سیلرز اور سویلینز کی جانب سے مزار اقبال پر پھولوں کی چادر چڑھائی۔ بعدازاں سٹیشن کمانڈر (نیوی)لاہورنے مزار اقبال پرفاتحہ پڑھی اور مہمانوں کی کتاب میں اپنے تاثرات قلمبند کئے۔مزار اقبال پر منعقدہ تقریب میں اعلیٰ عسکری و سول عہدیداران ، سکول کے بچوں اور شہریوں کی ایک کثیر تعداد نے شرکت کی۔