وزیراعلیٰ پنجاب نے تحصیل ہیڈ کوارٹر ہسپتال رائیونڈ کے توسیعی منصوبے کاافتتاح کردیا
لاہور۔(ملت آن لائن)وزیراعلیٰ پنجاب محمد شہبازشریف نے تحصیل ہیڈ کوارٹر ہسپتال رائیونڈ کے توسیعی منصوبے کا افتتاح کیا۔پبلک پرائیویٹ پارٹنر شپ کے تحت یہ توسیعی منصوبہ مکمل کیاگیاہے اوراب اس ہسپتال میں بستروں کی تعداد60سے بڑھ کر100کردی گئی ہے ۔وزیراعلیٰ محمد شہبازشریف نے تحصیل ہیڈ کوارٹر ہسپتال رائیونڈ کے توسیعی منصوبے کی افتتاحی تقریب سے خطاب کرتے ہوئے کہا کہ ہسپتال میں جدید مشینری ،طبی آلات،جدید آپریشن تھیٹر،آرتھوپیڈک اورگائنی کے شعبے قائم کیے گئے ہیں جہاں رائیونڈ اورملحقہ علاقوں کے لوگوں کو علاج معالجہ کی جدید اورمعیاری سہولتیں میسر آئیں گی اوریہ ہسپتال دکھی انسانیت کیلئے ایک مسیحا کا کردارادا کرے گا۔انہوں نے کہا کہ پنجاب بھر کے شہروں میں نئے ہسپتال بنا رہے ہیں جہاں علاج معالجہ کی جدید سہولتیں مہیا کی جارہی ہیں۔انہوں نے کہا کہ پنجاب کے تمام ڈسٹرکٹ ہیڈ کوارٹرز ہسپتالوں میں سی ٹی سکین مشینیں نصب کی جارہی ہیں اورہر ضلع میں ہیپاٹائٹس فلٹر کلینکس بنائے جارہے ہیں۔اب مریضوں کو سی ٹی سکین اورایم آرآئی کیلئے ملتان ،لاہور،سرگودھا اوردیگر بڑے ہسپتالوں میں جانا نہیں پڑے گابلکہ انہیں یہ سہولت اپنے علاقے میں ہی ملے گی۔ہم نے فرسودہ نظام کو بدل دیا ہے اوراب کوئی مریض کو یہ نہیں کہے گا کہ سی ٹی سکین مشین خراب ہے یا اس کی ڈیوٹی ختم ہوگئی ہے جو کمپنی سی ٹی سکین مشینیں نصب کررہی ہے وہی ان کو چلانے کی ذمہ دار ہوں گی اور مریضوں کو سی ٹی سکین کی سہولت 24گھنٹے دستیاب ہوگی،اب کوئی غریب مریض کا معاشی قتل نہیں کرسکے گا۔انہوں نے کہاکہ کتنے ظلم کی بات ہے کہ مریض تڑپ رہا ہو اورسرکاری ہسپتال میں سی ٹی سکین مشین چلانے والا اسے یہ کہے کہ مشین خراب ہے یا دو بج چکے ہیں کل آنا،اب ایسا نہیں ہوگا اور ہم نے اس نظام کو دفن کر دیاہے۔اب ہسپتالوں میں عوام کو علاج ملے گا،ہڑتالیں نہیں ہوں گی اوردکھی انسانیت کے دکھوں کا مداوا ہوگا۔ہسپتالوں میں معیاری ادویات کی فراہمی پر اربوں روپے خرچ کیے جارہے ہیں ۔انہوں نے کہا کہ یہ میری سوچ اور خواہش تھی کہ سرکاری ہسپتالوں میں وہی ادویات مریضوں کوملیں جو اگر خدانخواستہ میں بیمار ہوجاؤں تو استعمال کروں ۔آج میرا یہ خواب پورا ہوچکا ہے اوریہ ملک کی 70سالہ تاریخ کا پہلا موقع ہے کہ سرکاری ہسپتالوں میں غریب مریضوں کو وہی ادویات مفت مل رہی ہیں جو اشرافیہ استعمال کرتی ہے ۔ انہوں نے کہا کہ ادویات کے نمونے تجزیے کیلئے یورپ کی لیبارٹریوں میں بھجوائے گئے ہیں اور یہ بھی پہلی مرتبہ ہوا ہے کہ کسی دوائی کا نمونہ مسترد نہیں ہوا۔ ماضی میں 50فیصد ادویات کے نمونے مسترد ہوتے تھے ۔انہوں نے کہاکہ دور درازاورپسماندہ علاقوں میں موبائل ہیلتھ یونٹس عوام کو علاج و تشخیص کی جدید سہولتیں فراہم کررہے ہیں ،مزید25موبائل ہیلتھ یونٹس درآمد کیے گئے ہیں جن میں سے کچھ پہنچ چکے ہیں ،ان موبائل ہیلتھ یونٹس کو بھی صوبے کے دوردراز علاقوں میں بھجوایا جائے گا۔اسی طرح پنجاب بھر کے 40ہسپتالوں کو جدید خطوط پر استوار کیاگیا ہے اوریہاں اعلی معیار کی طبی سہولتیں اورادویات مہیا کی گئی ہیں۔یہ ہے وہ انقلاب جو ہم صحت کے شعبہ میں لارہے ہیں۔انہوں نے کہاکہ ہم صحت کے میدان میں انقلاب لارہے ہیں،دوسری جانب دھرنے اورلاک ڈاؤن کرنیوالے اس انقلاب کو خراب کرنا چاہتے ہیں ۔غریب کی زندگی میں خوشحالی اورعوام کی ترقی کا سفر انہیں گوارانہیں۔انہوں نے کہا کہ مسلم لیگ(ن) کے رکن پنجاب اسمبلی طاہر سندھو چند روز قبل مجھ سے ملے تھے ،گذشتہ روز حرکت قلب بند ہونے سے انتقال کرگئے،میں نے ان کے نماز جنازہ میں شرکت کی ۔کہنے کا مطلب یہ ہے کہ زندگی ایک بلبلہ ہے پھر یہ دھرنے اورلاک ڈاؤن اوراحتجاج کس بات کے؟ ہم غریب کی زندگی میں خوشحالی کاانقلاب لار ہے ہیں تو آپ کو کیوں تکلیف ہورہی ہے ؟ہم ملک میں قائدؒ واقبالؒ کا نظام لارہے ہیں تو دھرنوں کے ذریعے اسے روکنے کی کوشش کی جارہی ہے ۔اس سے بڑی پاکستان کے خلاف کوئی اور سازش ہونہیں سکتی۔جو قوم کو گمراہ کرتے ہیں اوردھوکہ دیتے ہیں میں ان سیاسی کاریگروں کو خبردار کرتاہوں کہ باز آجاؤ، ورنہ آپ کا گریبان ہوگا اورقوم کا ہاتھ ہوگا اوریہ قوم آپ کو کبھی معاف نہیں کرے گی۔ انہوں نے کہا کہ آپ نے گزشتہ ساڑھے چارسال کے پی کے میں کیا کیا؟صرف جھوٹ بولا،یوٹرن لیے اورعوام کو دھوکہ دیا۔آپ نے کہاتھا کہ میں کے پی کے میں میٹروبس نہیں بلکہ ہسپتال اورسکول بناؤں گا۔ساڑھے چار سال گزرنے کے بعد آپ کو پھر کے پی کے میں میٹروبس منصوبہ لگانے کا خیال آیالیکن ابھی تک آپ اس کی ایک اینٹ نہیں لگاسکے۔آپ نے ووٹرزکی لاج رکھنے کی بجائے تضحیک کی ہے۔آپ ہی نے ایک قابل احترام صحافی کو انٹر ویو دیتے ہوئے کہا تھا کہ میں اگلے پانچ سال میں نہ صرف کے پی کے میں لوڈ شیڈنگ ختم کردوں گا بلکہ پورے پاکستان سے بجلی کے اندھیرے دور کردوں گا۔کے پی کے میں پن بجلی سے ہزاروں میگاواٹ بجلی بنانے کے مواقع موجود ہیں لیکن آپ نے گزشتہ ساڑھے چار سالوں میں ایک کلو واٹ بجلی بھی پیدا نہیں کی۔دوسری جانب پنجاب حکومت نے اپنے وسائل سے صوبے میں پانچ ہزار میگاواٹ بجلی کے کارخانے مکمل کرلیے ہیں جبکہ دیگرمنصوبوں پر کام جاری ہے ۔نیازی صاحب آپ نے صرف قوم کو دھوکہ دیا ،جھوٹ بولاہے اورانتشار پیدا کیا ہے ۔اب آپ کس منہ سے عوام کے سامنے جائیں گے۔آپ نے مجھ پر اربوں روپے کی کرپشن کے الزامات بھی لگائے ،میں آپ کو عدالت میں لے گیا لیکن آپ عدالت بھی نہیں آئے ،بہتر ہوتا کہ آپ جو الزامات لگارہے ہیں ان کو ثابت بھی کرتے ۔انہوں نے کہاکہ عدالت میں آئیں اوراپنے کرپشن کے الزامات ثابت کردیں تو میں گھر چلا جاؤں گا اور آپ میری جگہ آجانا ،پھرجتنے مرضی جھوٹ بولنا اوریوٹرن لیتے رہنا۔ انہوں نے کہا کہ آپ گزشتہ ساڑھے چار سالوں سے مسلسل جھوٹ بول کر قوم کو گمراہ کررہے ہیں۔آپ ہی نے لاہور کی میٹروبس پر 70ارب روپے خرچ ہونے کا الزام لگایالیکن آپ اسے آج تک ثابت نہیں کرسکے،میں بار بار دھائی دیتا رہا کہ اس پر 30ارب روپے صرف ہوئے ہیں ۔انہوں نے کہا کہ اگر 2018ء کے انتخابات میں ہمیں کے پی کے میں کامیابی ملی تووعدہ کرتے ہیں کہ پشاور کی میٹروبس سروس کا منصوبہ ایک سال کے اندر مکمل کر کے چلائیں گے۔انہوں نے کہا کہ آپ نے کے پی کے میں ایک ارب درخت لگانے کا دعوی بھی کیا ہے ۔اتنے درختوں کی گنتی کرنے کیلئے ایک سال درکار ہے۔آپ نے کے پی کے میں نہ درخت لگائے نہ کوئی ہسپتال بنایا اورنہ ہی بجلی کا کوئی منصوبہ لگایاجبکہ ہم نے پنجاب میں ہزاروں میگاواٹ بجلی کے منصوبے لگائے ہیں۔آپ قوم کی رہنمائی کا دعوی کر کے قوم کو دھوکہ دے رہے ہیں ۔آپ عوام کی خدمت کرنے کی بجائے نتھیا گلی کے پہاڑوں پر چڑھ کر دوسروں کو ڈاکو چور کہتے ہیں۔یہ قوم تعلیم،علاج اورٹرانسپورٹ مانگتی ہے جبکہ آپ قوم کو جھوٹ ،افراتفری اورانتشار دے رہے ہیں ۔انہوں نے کہاکہ پاکستان مسلم لیگ(ن) کی حکومت نے گزشتہ ساڑھے چار سالوں میں عوام کی ترقی اورخوشحالی کیلئے بے مثال اقدامات کیے ہیں اوراگر عوا م نے ہمیں دو بارہ خدمت کاموقع دیا تو کراچی ،پشاور ،کوئٹہ اوردیگر شہروں کو ترقی کے لحاظ سے بدل کر رکھ دیں گے اورانہیں لاہور جیسا نہ بنایا تو میرا نام بدل دینا۔دعا ہے کہ اللہ تعالیٰ قوم کو جھوٹے اوربے بنیاد الزام لگانے والے لوگوں سے چھٹکارا دلائے اورملک وقوم کو ایسی قیادت ملے جو امانت ، دیانت اورمحنت کو شعار بنا کر پاکستان کو صحیح معنوں میں قائدؒ واقبالؒ کا پاکستان بنائے۔وزیراعلیٰ نے کہا کہ تحصیل ہیڈ کوارٹر ہسپتال رائیونڈ کے توسیع منصوبے کا کریڈٹ حکومت پنجاب،محکمہ صحت اورپوری مینجمنٹ کو جاتا ہے ۔انہوں نے کہا کہ پی کے ایل آئی کے پہلے مرحلے کا افتتاح ہوچکا ہے، اس کا کریڈٹ پی کے ایل آئی ٹرسٹ کے صدر ڈاکٹر سعید اختر اور ان کی پوری ٹیم کو جاتا ہے ۔ملتان کا شاندار کڈنی سنٹر رائیونڈ کا ہسپتال ،لاہور کے پانچ ہسپتالوں کے علاوہ مظفرگڑھ میں رجب طیب اردوان ہسپتال کو کوانڈس ٹرسٹ کے حوالے کیاگیاہے اوریہ ٹرسٹ انہیں بہترین انداز میں چلا رہا ہے ۔ٹرسٹ کے روح رواں ڈاکٹرعبدالباری ایک فرشتہ صفت انسان ہیں اورانکی پوری ٹیم درددل رکھتی ہے جو ایمانداری ،اخلاص اوربغیر کسی لالچ کے دکھی انسانیت کی خدمت میں مصروف ہے ۔میری دعا ہے کہ اللہ تعالیٰ اسے دن رات ترقی دے اوریہ اور زیادہ بہتر انداز میں دکھی انسانیت کی خدمت کرے۔انہوں نے کہا کہ صوبائی وزیرصحت خواجہ عمران نذیر اورسیکرٹری صحت علی جان ،سیکرٹری تعمیرات مواصلات میاں مشتاق اورصوبائی وزیر تنویر اسلم ملک کا بھی شکرگزار ہوں جنہوں نے اس ہسپتال میں نئی جان ڈال دی ہے ۔انہوں نے کہا کہ ہسپتال میں بہترین معالج اورجدید طبی آلات موجود ہیں اوریہاں گا ئنی کا شعبہ بھی بنایا گیا ہے جو 24گھنٹے طبی سہولتیں فراہم کرے گا۔میں اس ہسپتال میں کئی بار آچکا ہوں اورمجھے ہسپتال میں بہترین طبی سہولتیں دیکھ بے حد خوشی ہوئی ہے ۔وزیراعلیٰ نے ہسپتال کے توسیعی منصوبے کے افتتاح کے بعدہسپتال کا دورہ کیا اورمختلف شعبوں میں گئے۔وزیراعلیٰ نے وارڈز میں جاکر مریضوں کی عیادت کی اوران سے ہسپتال میں فراہم کی جانے والی طبی سہولتوں کے بارے میں پوچھا۔وزیراعلیٰ نے ہسپتال میں موجود ڈاکٹروں ،نرسوں اورپیرا میڈکل سٹاف سے گفتگو کرتے ہوئے کہا کہ دکھی انسانیت کی خدمت ہی آپ کا مقدس پیشہ ہے اورمجھے خوشی ہوئی ہے کہ یہاں تمام عملہ محنت کے ساتھ دکھی انسانیت کی خدمت کررہا ہے ۔وزیراعلیٰ نے فلٹرکلینک میں جا کر مریضوں سے بات چیت کی اور فلٹرکلینک میں مریضوں سے وہاں مہیا کی جانے والی علاج معالجے کی سہولتوں کے بارے میں دریافت کیا ۔وزیراعلیٰ نے کمیٹی روم میں اجلاس کی صدارت کرتے ہوئے ہدایت کی کہ آؤٹ ڈور مریضوں کیلئے کاؤنٹرز کی تعداد میں اضافہ کیا جائے تاکہ انہیں انتظار نہ کرنا پڑے۔