پنجاب حکومت

لاہور:(ملت) : وزیراعلیٰ پنجاب محمد شہباز شریف کی زیر صدارت اعلیٰ سطح کا اجلاس منعقد ہوا جس میں ہیلتھ کیئر سسٹم کی بہتری کے حوالے سے اقدامات کا تفصیلی جائزہ لیا گیا۔ اجلاس میں مریضوں کی سہولت اور انہیں بروقت طبی امداد کی فراہمی کیلئے ہسپتالوں کی ایمبولینسز کو ریسکیو1122 کے سپرد کرنے کا فیصلہ کیا گیا۔ وزیراعلیٰ محمد شہبازشریف نے اجلاس سے خطاب کرتے ہوئے کہا کہ صحت عامہ کی معیاری سہولتیں عوام کا بنیادی حق ہے اور پنجاب حکومت عوام کو بہترین طبی سہولتوں کی فراہمی کیلئے کوئی دقیقہ فروگذاشت نہیں کرے گی۔ صوبائی وزراء صحت صوبے کے ہسپتالوں اور صحت کی دیگر سہولتوں کا جائزہ لینے کیلئے خود دورے کریں۔ انہوں نے کہا کہ صحت کے شعبہ کی بہتری کیلئے جتنے وسائل دیئے ہیں اس کے نتائج بھی سامنے آنے چاہئیں۔ موجودہ روایتی نظام میں مریضوں کو ہسپتالوں میں علاج معالجے کی وہ سہولتیں میسر نہیں جو ان کا حق ہیں لہٰذا اس نظام میں اصلاحات لا کراسے بہترین ، فعال اور متحرک نظام میں بدلنا ہو گا۔ انہوں نے کہا کہ دکھی انسانیت کی تکالیف کا مداوا ہماری ذمہ داری ہے اور دکھی انسانیت کی خدمت درد دل کے ساتھ ہی ممکن ہے۔ ہسپتالوں میں ادویات کی فراہمی کے نظام کو کمپیوٹرائزڈ کرنے کیلئے فوری فیصلے کرنا ہوں گے۔وزیراعلیٰ نے ہدایت کی کہ محکمہ صحت اور ریسکیو1122 ہسپتالوں کی ایمبولینسز کو ریسکیو1122 کے سپرد کرنے کے حوالے سے جامع پلان بنا کر 7 روز میں پیش کریں۔ انہوں نے کہا کہ ہسپتالوں کو حقیقی معنوں میں شفا خانے بنانے کیلئے ایسے قابل عمل اقدامات کئے جائیں گے جس سے ہیلتھ کیئر سسٹم میں بہتری آئے گی۔ہیلتھ کیئر سسٹم کی بہتری کیلئے جوابدہی کا موثر نظام بھی ا نتہائی ضروری ہے اور ہم سب نے ملکر ہیلتھ کیئر سسٹم کو خوب سے خوب تر بنانا ہے ۔ انہو ں نے کہا کہ میں غیر انسانی نظام بدلنے کیلئے جنگ کر رہا ہوں اور اس نظام کو بدلنے تک چین سے نہیں بیٹھوں گا۔ ہیلتھ کیئر سسٹم کو بہتر بنانے کیلئے آغا خان یونیورسٹی ہسپتال کی مہارت سے بھی استفادہ کریں گے ۔ چیف ایگزیکٹو آفیسر آغا خان یونیورسٹی ہسپتال کراچی جوہانس تھیوڈورس کڈزیرسکی (Mr. Johannes Theodours Kedzierski) نے کہا کہ پنجاب حکومت کے ساتھ ہیلتھ کیئر سسٹم کی بہتری کیلئے تعاون کر کے خوشی ہو گی۔ چیف ایگزیکٹو آفیسر آغا خان یونیورسٹی ہسپتال کراچی، صوبائی وزراء خواجہ سلمان رفیق ، خواجہ عمران نذیر ،سیکرٹری سپیشلائزڈ ہیلتھ و میڈیکل ایجوکیشن،سیکرٹری پرائمری اینڈ سیکنڈری ہیلتھ، ڈی جی ریسکیو1122، طبی ماہرین اور اعلیٰ حکام نے اجلاس میں شرکت کی۔