پنجاب حکومت

چیف جسٹس جمہوریت مخالف قوتوں کو پہچانیں، رانا ثنااللہ
لاہور:(ملت آن لائن) وزیر قانون پنجاب رانا ثنااللہ کا کہنا ہےکہ چیف جسٹس سے گزارش کرتے ہیں وہ جمہوریت مخالفت قوتوں کو پہچانیں۔ رانا ثنااللہ نے کہا کہ عوام نے نوازشریف کا بھرپور ساتھ دینے کا اظہار کیا ہے جب کہ عمران خان عوام اور جمہوریت دشمن قوتوں کے گماشتے کے طور پر سامنے آئے ہیں، کل پارلیمنٹ میں انہیں عبرت ناک شکست ہوئی تو وہ اب اس معاملے کو اٹھا کر سپریم کورٹ میں لے گئے، عمران خان اپنے گھٹیا ایجنڈے کے لیے عدلیہ کا کندھا استعمال کررہے ہیں۔ انہوں نے کہا کہ چیف جسٹس سے گزارش ہے کہ شیخ رشید اور جمہوریت مخالف قوتوں کو پہچانیں، یہ لوگ سیاسی لڑائی کو گھسیٹ گھسیٹ کر سپریم کورٹ میں لارہے ہیں، یہ ان کی منفی سوچ ہے، یہ سپریم کورٹ کو عوام کے سامنے کھڑا کرنا چاہتے ہیں۔ وزیر قانون کا کہنا تھا کہ یہ لوگ عوام کو بھی عدالت کے سامنے لانا چاہتے ہیں لیکن عوام کا اپنے اداروں اور عدلیہ پر پورا اعتماد ہے۔