خبرنامہ پنجاب

لاہور13جون : وزیراعلیٰ پنجاب محمد شہبازشریف نے کہا ہے کہ پنجاب حکومت نے آئندہ مالی سال کیلئے تاریخ ساز بجٹ دیا ہے ۔عوام دوست ،کسان دوست،متوازن اورترقیاتی بجٹ سے پنجاب میں ترقی اورخوشحالی کے نئے دور کا آغا ز ہوگا اورپنجاب کا تاریخی بجٹ صوبے کے عوام کی ترقی و خوشحالی کی نوید ہے ۔انہوں نے کہاکہ آئندہ مالی سال کے سالانہ ترقیاتی پروگرام کا حجم550ارب روپے ہے جو گزشتہ سال کے مقابلے میں 37.5فیصد زائد ہے۔پنجاب حکومت نے صوبے کے 10کروڑ عوام کی ترقی وخوشحالی کیلئے اربوں روپے مختص کیے ہیں ۔تعلیم ،صحت ،زراعت،پینے کے صاف پانی اورسوشل سیکٹر کیلئے ریکارڈ فنڈز رکھے گئے ہیں ۔انہوں نے کہا کہ پنجاب کی تاریخ کے سب سے بڑے سالانہ ترقیاتی پروگرام پر عملدر آمد سے صوبے میں ترقی و خوشحالی کا دوردورہ ہوگا۔سالانہ ترقیاتی پروگرام کے تحت منصوبوں کومکمل کر کے عوام کی زندگیوں میں نکھار لائیں گے۔انہوں نے کہا کہ آئندہ مالی سال کا بجٹ غربت میں کمی،امیراورغریب کے درمیان فاصلے کم کرنے کا باعث بنے گا۔وزیراعلیٰ نے کہا کہ کاشتکاروں کی خوشحالی اورزراعت کے فروغ کیلئے بھی خطیرفنڈز رکھے گئے ہیں ۔ کھادوں اوربجلی سے چلنے والے زرعی ٹیوب ویلوں کے نرخوں میں کمی کا فائدہ چھوٹے کسان کو پہنچے گا۔کھادوں ،زرعی آلات اوربیجوں کی فراہمی پر اربوں روپے کی سبسڈی سے لاکھوں کاشتکار مستفید ہوں گے۔انہوں نے کہا کہ جنوبی پنجاب کی ترقی اورخوشحالی اور عوام کے معیار زندگی میں بہتری لانا ہمیشہ ہماری ترجیحی رہی ہے اسی مقصد کے پیش نظرجنوبی پنجاب کے عوام کی محرومیوں کے ازالے کیلئے اربوں روپے رکھے گئے ہیں ۔فلاحی پروگراموں میں بھی جنوبی پنجاب کا حصہ زیادہ رکھاگیا ہے۔انہوں نے کہا کہ اکنامک زونز کے قیام سے روزگار کے لاکھوں نئے مواقع پیداہوں گے۔دیہی علاقوں کی سڑکوں کی تعمیر و بحالی کے تاریخ ساز پروگرام سے دیہی معیشت ترقی کرے گی۔میٹروبس سسٹم نے ٹرانسپورٹ کے کلچر کو بدل دیا ہے،ملتان میں منصوبے کی تکمیل سے جنوبی پنجاب کے عوام مستفیدہوں گے۔آئندہ مالی سال کے بجٹ میں صوبے کے عوام کی ترقی وخوشحالی کیلئے بے مثال پروگرام اور منصوبے رکھے گئے ہیں