خبرنامہ پنجاب

فیصل آباد۔ فیصل آباد چیمبر آف کامرس اینڈانڈسٹری کے صدر شبیر حسین چاولہ نے دسمبر 2017 ء سے لے کر اب تک 7ماہ کے عرصہ میں چوتھی بار روپے کی قدر میں کمی پر تشویش کا اظہار کرتے ہوئے حکومت سے اپیل کی ہے کہ روپے کی بے قدری کو روکنے کیلئے فوری طو رپر ضروری اقدامات اٹھا ئے جائیں تاکہ ملک پر بیرونی قرضوں کے بڑھتے ہوئے دباؤ کو روکنے کے ساتھ ساتھ ملکی معیشت کو بھی اس کے منفی اثرات سے بچایا جا سکے۔ میڈیا سے بات چیت کے دوران انہوں نے کہا کہ پاکستان کی درآمدات و برآمدات میں بڑھتے ہوئے فرق نے پہلے ہی معیشت کیلئے خطرے کی گھنٹی بجا رکھی ہے، انہوں نے کہا کہ روپے کی بے قدری سے درآمدات جو پہلے ہی برآمدات سے بہت زیادہ تھیں ان میں مزید اضافہ ہو گا لہٰذا اس صورتحال سے نکلنے کیلئے ایسے سخت اقدامات کی ضرورت ہے جس کے ذریعے غیر ضروری درآمدات کو فوری اور مکمل طور پر روکا جا سکے۔