خبرنامہ پنجاب

لاہور۔(ملت آن لائن) ڈپٹی کمشنر لاہور کی ہدایت پر محکمہ پارکس اینڈ ہارٹیکلچر نے شہر بھر کے تمام چھوٹے و بڑے پارکس میں ڈینگی سپرے کرنا شروع کر دیا ہے،پی ایچ اے کے ذرائع نے بتایا کہ اس سلسلہ میں شہر کے تمام پارکوں کے باہر تحریری طور پر بھی آویزاں کیا گیا ہے اس لئے شام 6بجے سے لیکر ایک گھنٹے تک تمام پارکس اور باغات میں اینٹی ڈینگی سپرے کیا جا رہا ہے جس کیلئے خصوصی عملہ تعینات کیا گیا ہے تا کہ شہریوں کو ڈینگی کے ممکنہ خطرے سے بچایا جا سکے۔یہاں یہ امرقابل ذکر ہے کہ ڈینگی مچھر کی افزائش روکنے کے سلسلے میں کسی بھی سستی یا عدم توجہی کی قطعاً گنجائش نہیں کیونکہ لاروا کی پیدائش کے حوالے سے رواں موسم موزوں ہونے کے باعث سرویلنس سرگرمیوں کو مزید تیزاور نتیجہ خیز بنانے کی ضرورت ہے۔ محکمہ ماحولیات کے ذرائع کے مطابق ڈینگی کے خطرات کے پیش نظر انسدادی اقدامات پرعملدرآمد متعلقہ محکموں کی ترجیحات میں شامل ہونا چاہیے۔انہوں نے کہا کہ ڈینگی بخارسے بچاؤ کیلئے متعلقہ محکموں کو احتیاطی تدابیراختیار کرنا ہوں گی، ڈینگی لاروا کی پرورش گاہوں کو ختم کرنا ضروری ہے. سرکاری دفاتر اوررہائش گاہوں میں صفائی ، کاٹھ کباڑ کو محفوظ ٹھکانے لگانے ، پانی کے برتنوں ، ایئر کولر ، فریج کے ٹرے سمیت دیگر پانی کے برتنوں کی باقاعدگی سے صفائی ضروری ہے۔ انہوں نے کہاکہ اس کے علا وہ ورکشاپس ، قبرستانوں ، برف فروخت کرنے والے پھٹوں کے نیچے موجود پانی کی صفائی اوردیگر حفاظتی اقدامات کو یقینی بنایا جائے اورضلع میں انسداد ڈینگی مہم پر بھرپورانداز میں عملدرآمد کے لئے تمام متعلقہ محکمے کمربستہ رہیں اور سرویلنس اقدامات کو نتیجہ خیز بنانے کیلئے بہترین کارکردگی کامظاہرہ کیا جائے تاکہ ڈینگی وائرس کا مسئلہ سر نہ اٹھا سکے۔