آرمی چیف نے 4 دہشتگردوں کی سزائے موت کی توثیق کر دی
راولپنڈی(ملت آن لائن)آرمی چیف جنرل قمر جاوید باجودہ نے 4 دہشت گردوں کی سزائے موت کی توثیق کردی۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف نے جن 4 دہشت گردوں کی سزائے موت کی توثیق کی ان میں شبیر احمد، عمرا خان، طاہر علی اور آفتاب الدین شامل ہیں۔
آئی ایس پی آر کےمطابق چاروں دہشت گرد قانون نافذ کرنے والے اداروں پر حملوں، سپاہیوں کے اغوا اور قتل میں ملوث ہیں اور انہوں نے 21 افراد کو بھی قتل کیا جب کہ دہشت گردوں کے قبضے سے اسلحہ اور دھماکا خیز مواد بھی برآمد ہوا۔
ترجمان کے مطابق دہشت گردوں نے مجسٹریٹ کے سامنے اپنے جرائم کا اعتراف کیا اور انہیں فوجی عدالتوں نے سزائے موت سنائی۔
آرمی چیف جنرل قمر جاوید باجوہ اور ارکان پارلیمنٹ نے مشترکہ ذمہ داری اور کوششوں سے ملک کو دہشت گردی سے پاک کرنے کے عزم کا اظہار کیا ہے۔
پاک فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق جنرل ہیڈکوارٹرز راولپنڈی میں سینیٹ اور قومی اسمبلی کی دفاعی کمیٹیوں کے ارکان نے آرمی چیف جنرل قمر جاوید باجوہ سے ملاقات کی۔ اس موقع پر ارکان پارلیمنٹ کو بہتر ہوتی ہوئی سیکیورٹی صورتحال پر بریفنگ دی گئی۔
آئی ایس پی آر کے مطابق کمیٹیوں کے ارکان کو سرحد کی صورتحال اور امن کے قیام میں پاک فوج کی کاوشوں سے بھی آگاہ کیا گیا۔ ارکان پارلیمنٹ کے وفد کی قیادت سینیٹر لیفٹیننٹ جنرل (ر) عبدالقیوم کر رہے تھے جنہوں نے یادگار شہداء پر پھول بھی چڑھائے۔
پاک فوج کے شعبہ تعلقات عامہ ( آئی ایس پی آر) کے مطابق افغانستان کے دارالحکومت کابل میں امریکا، پاکستان اور افغانستان کے سہ فریقی مذاکرات ہوئے اور پاکستان جانب سے 6 رکنی وفد کی قیادت ڈی جی ایم او میجر جنرل ساحر شمشاد مرزا نے کی۔