خبرنامہ سندھ

کراچی: (آئی این پی) کراچی کی مقامی عدالت نے سانحہ بلدیہ ٹائون کیس انسداد دہشت گردی عدالت منتقل کر دیا ، فیکٹری مالکان سے 5 کروڑ روپے وصول کرنے والے علی حسن قادری کی ضمانت کا فیصلہ بھی انسداد دہشت گردی عدالت کرے گی ۔ جوڈیشیل مجسٹریٹ سائوتھ مقبول میمن کی عدالت سانحہ بلدیہ ٹائون کیس کی سماعت ہوئی ۔ وکلا اور فیکٹری ملازمین علی محمد ، شاہ رخ سمیت دیگر عدالت میں موجود تھے ۔ میڈیا کو کوریج کی اجازت نہیں دی گئی ۔ عدالت نے وکلا کے دلائل سننے کے بعد کیس انسداد دہشت گردی عدالت منتقل کرنے کا حکم دے دیا ۔ ضمنی چالان میں فیکٹری مالکان سمیت 13 ملزمان کو بے گناہ قرار دیا جا چکا ہے ۔ وکیل سرکار شیخ کا کہنا ہے کہ ان ملزموں کی بے گناہی کا فیصلہ انسداد دہشت گردی عدالت کرے گی اور فیکٹری مالکان سے 5 کروڑ روپے وصول کرنے والے علی حسن قادری کی ضمانت کا فیصلہ بھی اے ٹی سی کورٹ کرے گی۔