راولپنڈی(ملت آن لائن)بھارتی فورسز نے ایک بار پھر لائن آف کنٹرول پر سیز فائر کی خلاف ورزی کرتے ہوئے شہری آبادی کو نشانہ بنایا جس کا پاک فوج نے منہ توڑ جواب دیتے ہوئے دشمن کے 3 فوجیوں کو ہلاک اور کئی چیک پوسٹیں تباہ کردیں۔
پاک فوج کے شعبہ تعلقات عامہ (آئی ایس پی آر) کے مطابق بھارت کی جانب سے لائن آف کنٹرول پر لیپہ سیکٹر کے علاقے گھی کوٹ اور منڈال میں شہری آبادی کو نشانہ بنایا گیا جب کہ بھارت فورسز نے شہری آبادی کو اس وقت نشانہ بنایا جب لوگ نماز جمعہ کی تیاری میں مصروف تھے، بھارتی فورسز کی بلااشتعال فائرنگ سے ایک لڑکا شہید اور 4 شہری زخمی ہوئے۔
ترجمان پاک فوج کے مطابق بھارتی فورسز کی جانب سے بلااشتعال فائرنگ کا پاک فوج کی جانب سے موثر جواب دیا گیا جس کے نیتجے میں 3 بھارتی فوجی ہلاک اور متعدد زخمی ہوئے جب کہ پاک فوج کی کارروائی میں بھارت کی 3 چیک پوسٹیں بھی تباہ ہوئیں۔
ڈی جی آئی ایس پی آر کا کہنا تھا کہ پاک فوج بے گناہ شہری آبادی کے ساتھ کھڑی ہے اور دشمن کی کارروئیواں کا منہ توڑ جواب دیا جائے گا۔
دوسری جانب بھارت کی جانب سے سیز فائر کی خلاف ورزی پر دفتر خارجہ کا کہنا تھا کہ عالمی برادری مقبوضہ کشمیر کے معاملے پر بھارت کے خلاف تحقیقات کرے اور اقوام متحدہ معصوم کشمیریوں کی خون ریزی روکنے میں اپنا کردار ادا کرے۔