خبرنامہ

برطانیہ کے شہر مانچسٹر کے مانچسٹر ایرینا میں کنسرٹ کے دوران دو دھماکوں کے بعد بھگڈر مچ گئی جس سے 22 افراد ہلاک اور 50 سے زائد زخمی ہوگئے ۔ مانچسٹر ایرینا میں میوزک کنسرٹ کے دوران امریکی گلوکارہ آریانا گرینڈ پرفارم کر رہی تھی کہ اچانک میدان دو دھماکوں سے گونج اٹھا ۔ دھماکوں کے بعد بھگڈر مچ گئی ۔ واقعے میں 22 افراد ہلاک اور 50 سے زائد زخمی ہوئے ہیں ۔ پولیس چیف ایان ہوپکنز کے مطابق فی الحال واقعے کو دہشتگردی کے طور پر دیکھ رہے ہیں ۔ دھماکے کنسرٹ کے مقام کے بیرونی طرف ہوئے ۔ ہال میں 18 ہزار افراد کے بیٹھنے کی گنجائش تھی اور کنسرٹ کے دوران وہاں ہزاروں افراد موجود تھے ۔ دھماکوں کے بعد قریبی ٹرین سٹیشن وکٹوریہ سٹیشن بند کر دیا گیا ہے ۔ پولیس نے عوام کو دھماکوں کی جگہ سے دور رہنے کی ہدایت کی ہے ۔ ادھر وزیر اعظم ٹریزا مے نے اس کارروائی کو قابل نفرت قرار دیا ہے ۔ انہوں نے اپنی انتخابی مہم کو بھی معطل کر دیا ہے ۔ مانچسٹر میں امریکی گلوکارہ اور اداکارہ اریانا گرینڈے کے کنسرٹ کے دوران اس وقت دھماکا ہوا جب حاضرین ان کی آواز میں گیت سن رہے تھے ۔ وہ بچوں اور نوجوانوں میں مقبول ہیں اسی وجہ سے کنسرٹ میں ان کی تعداد زیادہ تھی ، تئیس سالہ گلوکارہ اور اداکارہ آریانا گرینڈ نے شوبز میں کیریئر کا آغاز براڈوے کے شو میوزیکل تھرٹین سے کیا ۔ انہوں نے دو ہزار نو میں نکلوڈیئن ٹی وی کے پروگرام وکٹوریس میں کیٹ ویلنٹائن کے کردار سے کیا ۔ گرینڈ نے اپنی گلوکاری کا آغاز دو ہزار گیارہ میں وکٹوریس سے کیا ۔ ان کی پہلی سٹوڈیو البم یورز ٹرولی تھی جو امریکی بل بورڈ ٹو ہنڈرڈ چارٹ پر پہلے نمبر پر آئی ۔ البم کا گانا دی وے بھی چارٹس پر پہلے نمبر پر آیا ۔ دو ہزار سولہ میں ٹائم نے انہیں دنیا کی سو بااثر شخصیات میں شامل کیا تھا ۔